Լուսնէջքէն Ետք Մարդկութիւնը Նոյնն Է

Document Properties

Title: Լուսնէջքէն Ետք Մարդկութիւնը Նոյնն Է
Subtitle: -
Category: -
Date Published: 7 օգոստոս 1969
Author: Մուշեղ Իշխան
Publication: «Ազդակ» օրաթերթ
Written Language Variant: Western Armenian
URL: https://www.aztagdaily.com/archives/448974
Scan URL: https://tert.nla.am/archive/NLA%20TERT/Azdak1927/1969/131_ocr.pdf

Document Contents

Line №

Line Contents

1

Լուսնէջքի ստեղծած առաջին մեծ խանդավառութենէն ետք զգացումի փոթորիկները սկսած են տակաւ հանդարտիլ։ Մեր երկրագունդի կեանքին հետ կապ ունեցող ընթացիկ մտահոգութիւններ խորհրդածութեան նիւթ կը դառնան կրկին։ Լուսնի գրաւման մեծ խնդիրը լուծուեցաւ մարդկային մտքի եւ քաջութեան յաղթանակով, սակայն այս աշխարհի զանազան հողամասերուն վրայ հազարումէկ ծանր խնդիրներ կան, որոնք ոչ միայն չեն լուծուիր, այլ օրէ օր կը բարդանան եւ արիւնոտ հանգոյցներու կը վերածուին։

2

3

4

5

6

7

Եւ ահա իրաւացիօրէն շրթունքներու վրայ կը բարձրանայ անխուսափելի հարցումը. ի՞նչ շահեցաւ մարդկութիւնը։ Բան մը փոխուեցա՞ւ հոգիներու մէջ։ Քայլ մը առաջ գացի՞նք ազնուութեան եւ սիրոյ ճամբուն վրայ։ Մեզ տանջող եւ մեզ բզկտող ներքին ցաւերը դարման գտա՞ն նուազագոյն չափով։ Ո՛չ, կը պատասխանեն այս մտահոգութիւնը ապրող բոլոր բարոյագէտներն ու իմաստասէրները։ Արդարեւ, իմաստասէր ըլլալու պէտք չկայ՝ հաստատելու համար, թէ մարդկութիւնը նոյնն է ըստ էութեան։ Արդարութիւնը խաչուած կը մնայ բիրտ ուժի խաչին վրայ։ Ազգերու եղբայրութեան գաղափարը խրտուիլակի վերածուած է՝ պետութիւնները իրարմէ բաժնող սահմանագլուխներու երկայնքին։ Եսապաշտութիւնը առանձին կը թագաւորէ։

8

9

Մե՜ղք աստղանաւորդներու սլացքին…

10

11

12

13

14

15

16

17

Լուսնին գրաւումը գիտութեան յաղթանակն է եւ ոչ թէ՝ բարոյականին։ Յառաջդիմութիւնը նիւթին ու թեքնիքին վրայ է եւ ոչ թէ՝ հոգիին։

18

19

Մարդը բաղդատող այս երկու արժէքները որքա՜ն հեռու են իրարմէ։

20

21

22

23

24

25

Վերջ ի վերջոյ բոլոր յառաջդիմութիւնները պէտք է ծառայեն դժբախտ մարդկութեան ցաւերուն դարման հասցնելու։ Կրնայ ըլլալ, որ յոռետեսներու մռայլ մտածումները չափազանցուած են եւ մեր աշխարհի լոյսը պիտի ծագի աստղերէն։ Արեգակը իր շռայլ ճառագայթներով եւ վեհափառ շքեղութեամբ չկրցաւ մեր հոգիներուն խաւարը փարատել։ Մտածողներ կան, թէ աստղերը պիտի յաջողին։ Երբ իրարու ետեւէ գրաւենք նորանոր աստղեր եւ անոնց մէջ հանդիպինք նոր կեանքով ապրող նոր արարածներու, այն ատեն միայն պիտի զգանք, թէ բոլորս մէկ երկրացի ենք, մէկ սիրտ, մէկ հոգի, ծնած՝ այս աշխարհի հողէն։

26

27

28

29

Լուսինը եւ Հայկական հարցը… ինչո՞ւ չէ, մի՛ զարմանաք։ Կարելի չէր նման խորհրդածութիւններու մղուիլ եւ մոռնալ Հայկական հարցը, որ այս երկրագունդին վրայ տիրող անարդարութեանց ամէնէն ցայտուն եւ գունագեղ օրինակն է։ Որքան ատեն լուսիններ կը գրաւուին, բայց բռնութիւնը կը տիրապետէ հոս՝ վարը, որքան ատեն արիւնոտ կրունկներ կը ճզմեն նուիրական սրբութիւնները մեծ ու պզտիկ ազգերուն, որքան ատեն կ՚աշխատին քաղաքակրթութեան կոթողներ փոշիացնել, մարդկութիւնը կը մնայ նոյնը, ապերջանիկ, տագնապահար եւ անձկալից։

30

31

Մարդիկ ամպերէն վեր բարձրացան, շա՜տ վեր, բայց ամպերը մնացին մեր հորիզոնին վրայ։